|
Dátueftirlitið hevur svarað einum fyrispurningi, har spurt varð um loyvt er privatum fyritøkum at senda privatfólkum sms-boð, sum tey ikki hava biðið um.
Talan var um dømi, har fysioterapeutur hevði mint á eina tíð til viðgerð, og at ein bilverkstaður hevði sagt frá, at bilurin hjá viðkomandi var liðugur at avheinta.
Í svarinum til viðkomandi metir Dátueftirlitið, at fysioterapeuturin og bilverkstaðurin hava heimild í § 9, stk. 1, nr. 1 í persónsupplýsingarlógini at senda hesi sms-boð. SMS-boðini eru at skilja sum ein áminning um eina tíð ella avtalu, sum viðkomandi sjálvur hevur biðið um, og ongar viðkvæmar upplýsingar eru í sms-boðunum.
§ 9, stk. 1, nr. 1 í persónsupplýsingarlógini er soljóðandi,
” Persónsupplýsingar kunnu bert viðgerast, um tann skrásetti hevur givið sítt samtykki, um viðgerðin er heimilað í lóg, ella um viðgerðin er neyðug til tess ,
1) at halda avtalu, sum gjørd er við skrásetta, ella sum skrásetti er partur í, ella fyri at gera tað, sum neyðugt er, fyri at slík avtala eftir áheitan frá skrásetta kann fáast í lag."
Í hesum føri viga áhugamálini hjá fyritøkuni at skipa og leggja til rættis arbeiðið tyngri enn verja av privatlívinum hjá viðkomandi.
Dátueftirlitið hevur í svarinum lagt dent á, at viðkomandi sjálvur hevur biðið um avtaluna, sum mint verður á, at viðkomandi sjálvur hevur givið telefonnummarið ella tað er alment atkomuligt, og at í sms boðunum eru ikki viðkvæmar persóns-upplýsingar.
|
datueftirlitid.fo